back to Books

 

يا جاهل

 

        ليش يا جاهل؟ لأنو بالكتاب المقدّس الجاهل هوّي الأحمق والخاطي وقليل المعرفة بالأمور الدينية أو غيره، هوّي ناقص الرأي، هوّي (الغشيم) يلّي ما بيعرف يخلّص نفسو.

الجاهل أعمالو وتصرّفاتو راح تكون معرّضة للغلط أو للخطر، (مثلاً: قليل المعرفة بالسباحة بيغرق، وقليل العلم، بالامتحان بيسقط).

والنبي أشعيا صرخ من قديم: لقد هلك شعبي من قلّة المعرفة.

الله بيطلب منّا نعمل الصالحات ونترك السيئات، لكن مع الجهل كل شي بيتغيّر والأمور بتكون إما ناقصة إما معكوسة، وبالأخص بالنسبة لوصايا الله وشريعتو. والغلط عند الجاهل، إنو ما بدّو يعرف ولا يتعرّف عَ الحقيقة. وبهالحالة كيف ممكن نعبد إله منجهّلْ شو بدّو منّا؟ وكيف ممكن نقدر نرضيه؟

كيف بدّو يقْوى إيمان الجاهل؟ إذا كان ما بَدّو يسمع ولا بَدّو يفهم. (الإيمان يكون من البشارة والبشارة من السماع). وبيقول القديس بولس عن يلّي ما عندهم إيمان يعني عن الجهّال: أسْلموا ذواتهم إلى العهر لارتكاب كل نجاسة في نهم لا يرتوي. أفسس4/19.

ولأنو الجهّال ما عندهم إيمان كفاية، مش ممكن يقدروا يرضوا الله. (لا يمكن أن نرضي الله بدون إيمان) عبرانيين 11/6. (قال الجاهل في قلبه ليس إله. ففَسَدَ ورَجَسَ بأعماله، ولم يعد يعمل الصلاح. مزمور13/1)

الجاهل مفكّر إنّو ما في الله، وما في مين يحاسب، وصار يتصرّف عَ ذوقو، بدون إلتزام بشريعة الله، أو بوصاياه.

والنبي أشعيا بيسأل وبيتعجّب؟! إستمعي أيتها السماوات، وانصتي ايتها الأرض فإن الرب قد تكلّم، إني ربّيت بنين، لكنّهم تمرّدوا عليّ، في الوقت أن الثور عرف مالكه، والحمار عرف معلف صاحبه، لكن شعبي لم يعرف ولم يُرِدْ أن يفهم شريعتي. فويلٌ لهذا الشعب الذي ترك أمر خلاصه! أشعيا1/2-4.

شعب الله المختار كان عندو مواقف جهل وعناد، لكن الجهل يلّي منتشر بين أبناء الله بهيدي الإيام، صار أخطر بكتير، ومش جهل لوحدو، لكن إلحاد وكفر كمان.

يقول سفر الأمثال: أتركوا الجهالات فتحيوا. أمثال9/6 – والجهّال يستهزؤن بالإثم. أمثال14/8 – ويحتقرون حكمة الله. أمثال1/7 – والجاهل مصيبة لأهله. امثال 17/25 والجاهل مبغض للعلم. أمثال1/22.

أما سفر الجامعة فيقول: (الله لا يرضى عن الجهّال 5/3) والغضب يستقر في أحضانهم 7/9. يعني ما بيسوى نغضب لأي سبب.

وبالعهد الجديد ينصحنا القديس بولس بقوله: لا تكونوا جهلاء بل افهموا ما مشيئة الله. افسس5/17 ومشيئة الله خلاصنا. والقديس بولس بيحكي عن حالو: أنا الذي كنت من قبل مجدّفاً ومضطهداً وشتّاماً، غير أني رُحمتُ لأني فعلتُ ذلك عن جهلٍ. 1 تيموتاوس1/13.

بينما الرب يسوع يساوي الجهل بباقي الخطايا: إن الزنى والقتل والطمع والحسد والجهل، هي خطايا تنجّس الإنسان. مرقس7/22.

وشعبنا اليوم، ما بدّو يهزّ حالو، عندو جوع روحي لكلمة الله ولأسراره، ومن تاني جهة راح ينشقّ من كتر الأكل والشرب والركض ورا الشهوات.

شعب ما بدّو لا يقرأ الكتب المقدّسة، ولا بدّو يصلّي ولا يصوم. (هيدا الحكي عن نسبة كبيرة) شعب عايش عَ الفطرة مكتفي بيلّي وصلّو من معلومات دينيّة، وما بقى بدّو أكتر. والأخطر إنّو عم يتعلّق بالبدع والخرافات وأعمال السحر وغيرها. بتشوف إنسان متعلّم وحاطِطْ خرزة زرقا مع الصليب عَ صدر إبنو . وكأنّو الصليب وحدو مش قادر يردّ صيبة العين؟! (دخل أمور وثنيّة كتيرة عَ الأعراس، عَ التياب، عَ الأعياد، عَ المناسبات وغيرها).

شعب راح يبقى إيمانو ضعيف متقلّب، لأنو ما بدّو يعرف أكتر عن يلّي بيساعدو عَ الخلاص، وما عندو قدرة يوقف بوجه التجارب والبدع والفلسفات.

وأكبر خدمة وأفضل هديّة منقدّمها للشرّير، هيّ إنو نِبقى عَ جهلنا – منجهل مصيرنا – منجهل ألاعيبو- بيقودنا متل العميان، ما منعرف نوقف بوجهو، شعب ماشي بالعتم، بالظلمة – والظلمة جهل جامعة2/14.

أما مع يسوع ولا جاهل كان ربحان، وأول متل: متى7/26 كل من يسمع أقوالي ولا يعمل بها، يُشبّه برجل جاهل، بنى بيته على الرمل. (فسقط البيت وكان سقوطه عظيماً).

وبإنجيل لوقا بيحكي عن الغني الجاهل (الأحمق): غني أغلّت له أرضه كثيراً، فهدم المخازن القديمة وبنى أكبر منها وقال: يا نفسي استريحي وكُلي واشربي وتنعّمي! فقال الله له يا جاهل في هذه الليلة تُطلبْ نفسك منك. لوقا12/20.

لأنك اغتنيت واكتفيت بغلاّتك، وتناسيت الله. وتناسيت عمل الرحمة بعد كل هذا الفيض من الخيرات. (البخل والجهل كانا سبب هلاك هيدا الغني).

أما في متل العذارى، كان الملكوت من نصيب الحكيمات لوحدهن. يُشبه ملكوت السماوات بعشر عذارى خمس حكيمات وخمس جاهلات . متى25/1-13

والجاهل ما بيميّز الغلط من الصّح. وما بدّو يتخلّى عن جهالتو، وهيك بيكون هوي مسؤول عن هلاك نفسو.

وبالآخر يسوع وجّه هيدا الكلام للفريسيين: أنتم على ضلال (على جهل) لأنكم لا تعرفون الكتب ولا قوة الله، ففي القيامة لا يزوّجون ولا يتزوّجون. متى22/29.

وهيدا النوع من الجهل هوّي أخطر ما يكون – ما بيعرفوا الكتب المقدّسة! ليش! عَ مين بدّك تحطّ الحق. طالما انت متعلّم وصرت كبير وبتقدر تتقدّم روحيّا، وليش بدّك يقولوا عنّك يا جاهل؟ أيمتى بيقولوا عنّك إنسان مؤمن، إنسان صاحب حكمة؟ شويّة إجتهاد ومثابرة والله بدّو يباركك.

وهلّق شو بدنا نعدّ حتى نعدّ؟

-       يا جاهل المطلوب واحد، إنّو تخلّص نفسك.

-       يا جاهل لا تخالف تعاليم الكتاب المقدّس.

-       يا جاهل إيّاك من محبّة المصاري، لأنّو الغني ما بيدخل السما بالهيّن.

-       يا جاهل لا تخاطر بحياتك بالسبق والرياضات الخطرة، شو بيطلعلك إذا متت؟

-       يا جاهل لا تخلّي الحقد والزعل والانتقام والطّمع والغضب والدعارة والسرقة يسيطروا عَ حياتك، ويعْمولك قلبك.

-       يا جاهل ليش عم تكْفر وتجدّف وتشتم؟

-       يا جاهل ليش تارك ربّك وماشي عَ طريق الإلحاد؟

-       يا جاهل ليش غرقان بالتدخين، بالمخدرات والكحول؟

-       يا جاهل ليش ما بتربّي ولادك عَ خوف (مخافة) الرّب؟

-       يا جاهل ليش عم تحرق تَعَبك ومعيشة عيلتك وحصّة الفقير بالقمار؟

-       يا جاهل ليش بايع ربّك كرمال المجد والعزّ والرّفاهيّة والتسليات السيئة؟

-       يا جاهل ممنوع الإجهاض وبعض وسايل منع الحمل الخطرة عَ الجنين.

-       يا جاهل إنت جيت عَ هيدي الدني مش حتى تاكل وتشرب وتسكر وتدخّن وتشرب قهوة وتعمل دواوين، وتتفرّج عَ التلفزيون وبس.

-       وبالآخر لمّن بتسمع كلمة يا جاهل يوم الدينونة – كون أكيد إنّو ما راح يكون إلك نصيب بالملكوت.

                                                                                                           

الخوري منير حاكمه

القبيات، تشرين الاول 2010

 

  back to Books